Para fillimit të seancës për votimin e komisioneve hetimore për energji, është mbajtur një konferencë për media nga kryetarët e grupeve parlamentare opozitare.

Kryetari i grupit parlamentar të Partisë Demokratike të Kosovës, Abelard Tahiri njoftoi se është bërë dakordimi mes opozitës dhe pozitës, për themelimin e dy komisioneve hetimore për energji.

Abelard Tahiri, kryetar i grupit parlamentar të PDK-së

”Pas një beteje të gjatë, ne si grupe parlamentare si opozitë ashtu edhe pozitë jemi dakorduar të procedojmë me themelimin e dy komisioneve hetimore, atë që e kemi kërkuar ne si opozitë dhe po ashtu edhe komisionin që ka kërkuar pozita”, tha Tahiri, transmeton PortaliD.

Ai ndër të tjera falënderon edhe kryetarin e Kuvendit, Glauk Konjufca, për korrektësinë e tij në këtë periudhë, që të arrihet marrëveshja e formimit të  këtij komisioni të kërkuar nga opozita për hetimin e krizës energjetike, shpenzimin e 125 milionëve dhe shtrenjtimin e energjisë elektrike.

Ai shton se për opozitën është e rëndësishme që kërkesat e tyre të jenë vetëm në një komision parlamentar, dhe kjo ka ndodhur.

Ndërsa, Arben Gashi, kryetar i grupit parlamentar të Lidhjes Demokratike të Kosovës(LDK), tha se do të formohen komisionet hetimore parlamentare dhe Kuvendi do t’i kthehet normalitetit.

Arben Gashi, kryetar i grupit parlamentar të LDK-së

”Sjellja e papërgjegjshme shpresoj që ka marrë fund, dhe kuvendi të hyjë në punën e vet normale, në mënyrë që të marrin vendime, të nxjerrin ligje dhe të kryejmë funksionet tona kushtetuese dhe politike”, tha Gashi.

Opozita kërkon shtyrjen e seancës derisa të themelohet komisioni për energji