Inspektorati Qendror i Mbikëqyrjes së Tregut, në bashkëpunim me Ministrinë e Industrisë, Ndërmarrësisë dhe Tregtisë, ka identifikuar dhe asgjësuar 1 mijë e 154 disqe për prerjen e hekurit dhe betonit me afat të skaduar në disa qytete të vendit tonë.
Siç thuhet në njoftim, inspektimet u zbatuan nga inspektorët e tregut dhe u zbulua se këto produkte paraqesin rrezik për përdoruesit.
Produktet e identifikuara ishin të brendeve dhe dimensioneve të ndryshme, por të gjitha me afat të skaduar të përdorimit.
Inspektorët e tregut morën masa të menjëhershme për t’i larguar këto produkte nga tregu dhe për t’i shkatërruar ato.
“Këto produkte si të tilla paraqesin rrezik për përdorim nga konsumatorët dhe në të gjitha rastet operatorët ekonomikë kanë bërë shkatërrimin/asgjësimin e këtyre produkteve me afat të skaduar në prezenc të Inspektorëve të Tregut”, thuhet në njoftimin e Ministrisë.
Ministria e Industrisë, nëpërmjet Inspektoratit Qendror të Mbikëqyrjes së Tregut, ka si prioritet mbrojtjen e shëndetit dhe sigurisë së qytetarëve.
Ministria u bën thirrje qytetarëve që të raportojnë çdo produkt të dyshimtë në treg, në mënyrë që inspektorët e tregut të ndërmarrin veprime të nevojshme përkatësisht në përputhje me ligjin dhe kompetencat e tyre.