Anëtari i Kryesisë së Lidhja Demokratike e Kosovës, Berat Rukiqi, ka deklaruar se partia e tij pret nga Gjykata Kushtetuese e Kosovës të japë një vendim për zgjidhjen e çështjes së zgjedhjes së presidentit, jo për të gjetur fajtorë politikë.
“Kemi qenë bashkëpunues duke shkuar në të gjitha takimet… ne po ta kishim bërë politike ndryshe që të largoheshim nga kjo tentativa e vazhdueshme për të gjetur fajtor, por më mirë me pasur tentativat për të gjetur zgjidhje për problemet sigurisht sot do t’i kishim punët më mirë në shumë procese”, ka theksuar ai.
Rukiqi në emisionin FIVE ka theksuar se LDK-ja ka qenë bashkëpunuese gjatë të gjitha takimeve politike dhe se partia ka qenë e gatshme të mbështeste një kandidaturë konsensuale, përfshirë edhe presidenten në detyrë, Vjosa Osmani, me qëllim që vendi të ketë stabilitet dhe të vazhdojë proceset e nisura.
Ai ka shtuar se vonesat dhe bllokadat politike në Kuvend nuk kanë qenë procedurale apo kushtetuese, por pasojë e vullnetit politik të partisë në pushtet, e cila sipas tij ka synim të kontrollojë të gjitha pushtetet.
“Asnjë bllokadë politike në Kosovë nuk ka qenë procedurale, nuk ka qenë kushtetuese këto janë si pasojë e vullnetit politik, dhe vullneti politik i partisë që i ka fituar 51 për qind nuk është me nda as pushtet, por është me kontrollu gjithçka. Në një shoqëri e cila pretendon me prodhu demokraci është e rrezikshme, nëse dikush ka synim me i kontrollu të gjitha pushtetet është e rrezikshme”, ka deklaruar ai.
“Askush nuk i dëshiron zgjedhjet, kemi shkuar me bindje të plotë për t’i shmangur ato. Partitë janë për të garuar, jo për t’u frikësuar nga zgjedhjet”, ka theksuar tutje Rukiqi.