Administrata Tatimore e Kosovës (ATK) ka bërë të ditur se gjatë periudhës janar–gusht 2025 ka mbledhur gjithsej 713.3 milionë euro të hyra tatimore, duke tejkaluar për 71.2 milionë euro shifrat e së njëjtës periudhë të vitit 2024.
Sipas njoftimit, ky rezultat është tregues i një trendi të qëndrueshëm të rritjes së të hyrave, që lidhet jo vetëm me zbatimin e ligjit dhe forcimin e administrimit tatimor, por edhe me vetëdijen e shtuar të tatimpaguesve për përmbushjen e obligimeve të tyre.
“Administrata Tatimore e Kosovës ka arritur që në periudhën janar–gusht të 2025 të mbledhë gjithsej 713.3 milionë euro të hyra, duke tejkaluar të hyrat e së njëjtës periudhë të vitit 2024 për 71.2 milionë euro.
Ky rezultat dëshmon për një trend të qëndrueshëm të rritjes së të hyrave tatimore, që pasqyron jo vetëm përkushtimin e ATK-së në zbatimin e ligjit dhe forcimin e administrimit tatimor, por edhe vetëdijen gjithnjë e më të lartë të tatimpaguesve për përmbushjen e obligimeve të tyre.
Rritja e të hyrave ka rëndësi të veçantë për stabilitetin fiskal të vendit, sepse garanton më shumë mjete për investime publike, zhvillim ekonomik dhe përmbushjen e nevojave të qytetarëve. Kjo është dëshmi se partneriteti i ndërtuar ndërmjet ATK-së dhe tatimpaguesve po jep rezultate të prekshme dhe afatgjata.
Në këtë kuadër, ATK rikujton se qëllimi i saj nuk është ndëshkimi i tatimpaguesve, por edukimi dhe ndërgjegjësimi i tyre, me qëllim që obligimet tatimore të trajtohen si përgjegjësi e natyrshme qytetare dhe biznesore. Prandaj, institucioni do të vazhdojë të investojë në trajnime, fushata informuese dhe shërbime digjitale që u lehtësojnë tatimpaguesve procesin e përmbushjes së obligimeve”, thuhet në njoftim.