Ndërtesa ku lindi Adolf Hitleri, në qytetin Braunau am Inn pranë kufirit mes Austrisë dhe Gjermanisë, është shndërruar zyrtarisht në stacion policie, në kuadër të përpjekjeve të autoriteteve austriake për të penguar që objekti të shndërrohet në një pikë grumbullimi për simpatizantët e neonazizmit.
Vendimi vjen pas vitesh debatesh mbi fatin e ndërtesës historike, e cila ishte në pronësi private dhe për një periudhë kishte shërbyer si qendër për një organizatë bamirëse për personat me aftësi të kufizuara. Në vitin 2017, qeveria austriake e shtetëzoi objektin përmes një blerjeje të detyrueshme, ndërsa dy vjet më vonë njoftoi se ai do të përshtatej për nevojat e policisë.
Edhe para rikonstruksionit, ndërtesa nuk kishte shenja që e identifikonin drejtpërdrejt si vendlindjen e Hitlerit. Në afërsi të saj ndodhet një gur përkujtimor i vendosur nga ish-kampi i përqendrimit Mauthausen, me mbishkrimin “Kurrë më fashizëm”, pa përmendur emrin e diktatorit nazist. Pas transformimit, në fasadën e objektit është vendosur vetëm tabela me mbishkrimin “Policia”.
Sipas autoriteteve lokale, ndërtesa vazhdon të tërheqë vizitorë që ndalojnë për të bërë fotografi, megjithatë incidentet e lidhura me simpatizantë të ideologjisë naziste janë bërë shumë më të rralla se në të kaluarën. Në Austri, përdorimi i përshëndetjes naziste dhe simboleve të regjimit të Hitlerit është i ndaluar me ligj.
Kryebashkiaku i Braunau am Inn, Johannes Waidbacher, i cili ishte pjesë e komisionit që shqyrtoi të ardhmen e objektit, tha se përdorimi i tij për funksione publike është një zgjidhje e arsyeshme, megjithëse efektiviteti i saj do të vlerësohet me kalimin e kohës.
Megjithatë, vendimi nuk është pritur pozitivisht nga të gjithë. Komiteti Mauthausen, organizata kryesore e të mbijetuarve të Holokaustit në Austri, ka kundërshtuar shndërrimin e ndërtesës në stacion policie, duke argumentuar se objekti duhet të shërbejë më tepër si një vend që kujton dhe edukon publikun për krimet e regjimit nazist dhe pasojat e Holokaustit.