Avokati nga Kosova i cili jeton në Zvicër, Sali Bislimi, të mërkurën, ka njoftuar se e ka vizituar në Hagë, ish-presidentin e Kosovës, Hashim Thaçi.
Ai përmes një postimi në Facebook, ka thënë se pritet që t’i bashkohet ekipit mbrojtës të ish-presidentit Thaçi, i cili po gjykohet në Hagë për krime lufte.
Avokati ndër të tjera ka treguar se nëpërmjet zyrës së tij ligjore në Zvicër, do të organizojë ekipin e avokatëve zviceranë për të ndihmuar avokatët mbrojtës të Thaçit.
“Sapo dola nga vizita që i bëra presidentit Hashim Thaçi në Hagë. Presidenti Hashim Thaçi pranon në parim propozimin tim që nëpërmjet zyrës sime ligjore First-Consulting.ch të organizoj ekipin e avokatëve zviceranë për të ndihmuar si vlerë të shtuar bashkë me avokatët tjerë që ka”, ka shkruar Bislimi.
Sipas tij, themeluesi i shtetit të Kosovës meriton mbështetje, e që pa dyshim siç thotë ai kjo mbështetje do të gjendet te diaspora shqiptare në Zvicër dhe ajo në Gjermani.
Bislimi tutje ka shkruar se është befasuar kur ka kuptuar se Gjykata e Hagës nuk zbaton të drejtën themelore për të ushtruar lirinë fetare.
“Nuk mbahet në burg presidenti për xhelozi, ne do të bëjmë realitet lirimin e tij”, ka theksuar Bislimi.
Ai postimin e tij e ka përmbyllur “Me presidentin”.
