“Për Joe Biden nuk e di nëse do të mund të vijë, sepse tash është president i Shteteve të Bashkuara të Amerikës, mirëpo kemi ftuar figura të tjera si gjenerali Wesley Clark, ambasadori Kouchner dhe të tjerë, të cilët kanë pasur lidhje me Kosovën. Për shkak që Gjykata nuk ka lejuar që ata të dëgjohen më herët, shpresoj që ata të jetojnë sa më gjatë”.
Kështu ka deklaruar avokati i ish-presidentit të Kosovës, Hashim Thaçi, Gregory Kehoe.
Kjo deklaratë e tij vjen pas fjalimit të ish-presidentit Thaçi, i cili iu drejtua Speciales, ku theksoi se i vjen keq që për pafajësinë e tij s’do të mund të dëshmojnë disa figura të larta botërore, por edhe ato vendore.
Ibrahim Rugova, Fehmi Agani, Madeleine Albright, Richard Hoolbroke e disa të tjerë, janë përmendur nga Thaçi, si emra që i vjen keq që s’do të mund të dëshmojnë.
E për këtë, avokati Kehoe ka thënë se ka ftuar disa figura të tjera, të cilët kanë pasur lidhje me Kosovën, të cilët nuk janë lejuar më herët të dëgjohen nga Gjykata Speciale.
Ndryshe, gjatë fjalimit të tij, Thaçi tha se ndien keqardhje për të gjitha viktimat dhe sërish u shpreh i pafajshëm.
Më 3 prill ka filluar gjykimi i ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi nga Gjykata Speciale në Hagë.