Avokati Arianit Koci, i autorizuar si përfaqësues i familjes së Faton Hajrizit ka konfirmuar se ka mbërritur në Serbi dhe se e ka gjetur vendin ku po mbahet trupi i tij.
Në një përgjigje për Dukagjinin, Koci ka thënë se për detaje tjera në lidhje me rastin do të lajmërohet gjatë ditës.
Faton Hajrizi, shtetas kosovar, ishte arratisur nga burgu i Smrekonicës më 6 korrik.
Në orët e para të 18 korrikut, u bë i dyshuar për vrasjen e një polici serb dhe plagosjen e një tjetri në orët e para në Lloznicë, qytet në pjesën perëndimore të Serbisë.
Një ditë më vonë, autoritetet serbe raportuan për vrasjen e tij.
Ndërkaq, Ministria e Punëve të Jashtme dhe Diasporës e Kosovës më 22 korrik bëri të ditur se kanë konfirmuar identitetin e Hajrizit nga shenjat e gishtërinjve të dërguara nga autoritetet serbe përmes Drejtorisë së Bashkëpunimit Ndërkombëtar Policor (ILECU) në kuadër të Misionit të BE-së për sundim të ligjit në Kosovë.