Ish-presidenti i Fenerbahçe SK, Aziz Yildirim, po konsiderohet si një nga kandidatët kryesorë për të marrë sërish drejtimin e gjigantit turk në zgjedhjet që do të mbahen në fillim të muajit qershor.
Sipas mediave turke, Yildirim ka përgatitur një projekt ambicioz për rikthimin e Fenerbahçes në majat e futbollit turk dhe evropian. Raportohet se ai planifikon një investim prej rreth 200 milionë eurosh në skuadër, me fokus të veçantë te përforcimi i repartit ofensiv.
Në listën e objektivave të tij gjenden dy sulmues të njohur: ylli kosovar Vedat Muriqi dhe norvegjezi Alexander Sørloth.
“Aziz Yildirim nuk dëshiron të bëjë gabime në transferimin e sulmuesve”, ka shkruar mediumi turk “haberler.com”, duke lënë të kuptohet se ish-presidenti synon të ndërtojë një skuadër konkurruese që nga sezoni i ardhshëm.
Muriqi po kalon formë të jashtëzakonshme me RCD Mallorca në La Liga, ku ka realizuar plot 22 gola këtë edicion. Paraqitjet e tij kanë rikthyer interesimin e shumë klubeve, ndërsa një rikthim te Fenerbahçe do të ishte mjaft i veçantë për sulmuesin kosovar, i cili kishte lënë gjurmë edhe gjatë aventurës së parë në Turqi.
Ndërkohë, tifozët e Fenerbahçes presin me shumë interes zgjedhjet presidenciale, pasi skuadra ka mbetur në hije të rivalit të madh Galatasaray SK në vitet e fundit.
Aziz Yildirim e kishte udhëhequr më parë Fenerbahçen për shumë vite dhe konsiderohet një nga presidentët më të suksesshëm në historinë e klubit.