Deputeti i Lëvizjes Vetëvendosje, Mefail Bajqinovci, ka kërkuar nga Bashkimi Evropian që të bëjë më shumë presion ndaj Serbisë.

Arsye e mjaftueshme, sipas tij, është përkrahja e tyre ndaj Rusisë, e cila është duke kryer krime në Ukrainë.

“BE duhet të bëjë më shumë presion ndaj Serbisë, e ka shpallur organizatë terroriste qeverinë e tyre (të Rusisë), mendoj që edhe ata që e përkrahin duhet të hyjnë në atë listë”, ka thënë Bajqinovci.

Tutje, deputeti i LVV-së ka thënë se së fundi, vërehet një seriozitet më i shtuar i bashkësisë ndërkombëtare ndaj dialogut Kosovë-Serbi.

Bajqinovci ka theksuar se kryeministri i Kosovës, Albin Kurti, nuk do të pranojë marrëveshje përfundimtare me Serbinë, nëse aty nuk përfshihet njohja e ndërsjellë.

“Mendoj që ka seriozitet nga bashkësia ndërkombëtare shumë më shumë, çdo katër ditë vijnë emisarë nga BE dhe ShBA. Por edhe njerëz te tjerë të rëndësishëm, senatorë e diplomatë”, ka thënë ai.

Vizitat e shpeshta të emisarit amerikan, Gabriel Escobar, Bajqinovci i ka interpretuar si mbështetje të ShBA-së për shtetin e Kosovës.