Deputetja e Lidhjes Demokratike të Kosovës, Hykmete Bajrami, ka reaguar ndaj vendimit të Qeverisë së Kosovës për ndarjen e 26 milionë eurove për studentët, vetëm pak ditë para zgjedhjeve lokale të 12 tetorit.
Në një postim në Facebook, Bajrami e ka quajtur këtë vendim “skemë të korrupsionit publik” dhe “tentativë për blerje votash” nga Lëvizja Vetëvendosje.
“26 milionë Euro, kostoja e blerjes së votës nga ana e LVV-së. Prokuroria është vonu t’i nxjerrë nga zyra këta uzurpator që blejnë vota me taksa të qytetarëve. Kjo është skemë e korrupsionit publik. Qytetarët do t’i ndëshkojnë keqpërdoruesit me 12 tetor”, ka shkruar Bajrami.
Qeveria e Kosovës, në mbledhjen e mbajtur sot, ka ndarë gjithsej 26 milionë euro për studentët. Vendimi përfshin pagesën prej 100 eurosh për secilin student, si dhe bursën e mobilitetit për studentët e nivelit bachelor, për t’i mbështetur ata që studiojnë larg vendbanimit të tyre.
Ky vendim është marrë më pak se një javë para mbajtjes së zgjedhjeve lokale të 12 tetorit.