Deputetja e Lidhjes Demokratike të Kosovës, Hykmete Bajrami, teksa ka komentuar situatën e ndodhur në Kuvendin e Kosovës, ka thënë se “ata që i fituan votat me dhunë, me dhunë po mundohen t’i ruajnë”.
Kështu është shprehur ajo në një postim në Facebook, pas përleshjes së deputetëve opozitarë me ministrat në kuvend.
“Ata që i kanë fituar votat me dhunë, me dhunë po mundohen t’i ruajnë. Pavarësisht asaj çka ndodhi sot në Kuvend mos harroni se Qeveria e cila koordinohet me njerëz që janë në listën e zezë të SHBA-ve, që nga mbrëmë po i tërheqë policinë prej ndërtesave komunale në veri. Prej krizës në krizë deri….ku?”, shkroi ajo.
Teksa kryeministri i Kosovës, Albin Kurti, po fliste në foltoren e Kuvendit të Kosovës, ai është sulmuar nga deputetët e opozitës.
Ky reagim i opozitës vjen pasi zëvendëskryeministri Besnik Bislimi ka larguar fotografinë e vendosur në foltore nga deputetja e PDK-së, Ganimete Musliu.
Kurti është spërkatur fillimisht me ujë nga deputeti i PDK-së, Mergim Lushtaku, e më pas filloi përleshja në mes të deputetëve të opozitës dhe atyre të pushtetit.
Në këtë kohë zëvendëskryeministri Besnik Bislimi e ka goditur deputetin Lushtaku me shishe të ujit në fytyrë, ku më pas deputetët e pushtetit e të opozitës janë përfshirë në rrahje.