Në emër të Lidhjes Demokratike të Kosovës, deputetja, Hykmete Bajrami, ka thënë se Qeveria është dashur ta tërheqë ligjin e buxhetit dhe ta kthejë për një rialokim “komplet tjetër ose nga sot ky ligj të shkojë në lexim të tretë”.
Në seancën e Kuvendit të Kosovës, deputetja Bajrami ka thënë se është koha e fundit që arsimi në Kosovë të bëhet prioritet kombëtar.
“Më 5 dhjetor, Kosova pranoi rezultatet e testit PISA 2022, ku Kosova u rendit në vendin e 79… sipas të dhënave të Ministrisë së Arsimit, 33 për qind të shkollave në Kosovë dhe 77 për qind të paralele nuk i përmbushin kushtet për të mbajtur mësim sipas kritereve ligjore. Është koha e fundit që arsimi në Kosovë të bëhet prioritet kombëtar, është koha që Kosova të merret seriozisht në riorganizimin e rrjetit të shkollave”, tha ajo.
Sipas saj, për 13 vjet, numri i nxënësve në Kosovë ka rënë për 300 mijë.
“Ndërkohë që ne ende vazhdojmë të ndërtojmë shkolla në disa zona rurale dhe kemi mungesë të klasave dhe shkollave në zona urbane. Duhet të ndodhë një rialokim të buxhetit dhe duhet me pas një taskforcë që merret me reformën në arsim. Duhet të fillohet nga trajnimi për rikualifikimin gjithëpërfshirës të nxënësve, duhet të ketë ngritje të pagave në arsim”, tha tutje ajo.