Deputetja e LDK-së, Hykmete Bajrami, ka dalë me një propozim për SBASHK-un dhe Qeverinë e Kosovës, me rastin e shënimit të njëmujorit të grevës në arsim.
Përmes një postimi në Facebook, Bajrami i ka rekomanduar SBAShK-ut të pranojë ofertën e Qeverisë së Kosovës prej 50 eurosh, ofertë e cila sipas saj, duhet të vazhdojë deri më 31 dhjetor të këtij viti. Krahas kësaj, ajo ka thënë se nga një janari duhet të hyjë implementimi i Ligjit të Pagave. Në të kundërtën, ajo ka sugjeruar veprime të tjera.
“I rekomandoj SBASHK-ut që të rishikojë kërkesat kështu: Të pranohet oferta e Qeverisë për shtesën 50 euro, por kjo shtesë të vazhdojë deri më 31.12.2022. Më 01.01.2023 të fillojë implementimi i Ligjit të Pagave. Në rast se Ligji i Pagave nuk hyn në fuqi, të planifikohet buxheti që shtesa prej 50 euro të vazhdojë deri në hyrjen në fuqi të këtij ligji. Qeveria të mos zbatojë ndëshkime në paga, për muajin shtator”, ka shkruar ish-ministrja e Arsimit dhe njëherësh, ish-ministrja e Financave.
Ajo ka bërë apel që shkollat dhe çerdhet të hapen të hënën.
Greva në arsim ka filluar që nga 25 gushti. Grevistët kanë kërkuar shtesën prej 100 eurosh, duke refuzuar ofertën prej 50 eurosh të Kryeministrit të Kosovës, Albin Kurti të cilën e kishte prezantuar së bashku me Ministrin e Financave, Hekuran Murati, në kuadër të pakos së përballjes së rritjes së inflacionit.