Deputetja e Lidhjes Demokratike të Kosovës, Hykmete Bajrami, ka reaguar për rritjen e çmimit të naftës, që të dielën kaloi 1.70 euro për litër.

Ajo ka thënë se një qeveri e përgjegjshme do të ulte TVSh-në për karburantet nga 18% në 8% dhe do të organizonte takime me odat ekonomike dhe Shoqatën e Naftarëve për t’iu dalë në ndihmë qytetarëve dhe bizneseve.

Bajrami ka kritikuar kryeministrin Albin Kurti, duke thënë se strategjia e tij është “varfëro e sundo”.

Sipas saj, Qeveria po shfrytëzon rritjen e çmimeve për të mbledhur më shumë të ardhura buxhetore në prag të zgjedhjeve, ndërsa qytetarët përballen me krizë ekonomike.

Bajrami ka thënë se Kurti dhe kabineti i tij, me strategjinë e dështuar 6-vjeçare, duhet të shkojnë në opozitë.