Pas pezullimit të katër zyrtarëve të IML-së, për zhdukjen e provave në rastin e Astrit Deharit, Nazlie Bala, nga Ministria e Drejtësisë, ka thënë se ministrja Albulena Haxhiu, do të ndërmarrë edhe veprime të tjera.
“Janë pezulluar katër zyrtarë të laboratorit, Haxhiu do me kompetencat që i ka do të ndërmarrë edhe veprimet të tjera. Po ashtu, prokuroria speciale dhe policia i kanë filluar hetimet në lidhje me rastin në fjalë”, ka thënë ajo.
Për këtë rast të enjten, janë pezulluar nga puna katër zyrtarë në Institutin e Mjekësisë Ligjore, kështu ka bërë të ditur Ministria e Drejtësisë nëpërmjet një postimi në Facebook.
Zyrtarët e pezulluar nga puna sipas njoftimit nga Ministria e Drejtësisë, janë: Nardi Sheqergjiu, Toksikolog Mjekoligjor në Institutin për Mjekësi Ligjore, Flutura Goga, Udhëheqëse e Laboratorit të Toksikologjisë në Institutin për Mjekësi Ligjore, Anila Lakna, Teknike e Laboratorit të Toksikologjisë në Institutin për Mjekësi Ligjore, si dhe Ilirjana Shala, Kimiste në Institutin për Mjekësi Ligjore.
Ky vendim është marr nga Ministria e Drejtësisë, pas pranimit të informacionit të zhdukjes së mostrave të Astrit Deharit, dhe vendimi tashmë hyrë në fuqi këtë të enjte, më 8 dhjetor.