Një mbrëmje e jashtëzakonshme artistike është shënuar në skenën e kryeqytetit me shfaqjen e baletit “Transformim”, koreografuar nga Driton Sh. Saqipi dhe organizuar nga shkolla artistike “Prenk Jakova”.
Nën përkujdesjen e Drejtorisë së Kulturës në Komunën e Prishtinës, kjo ngjarje solli për publikun një spektakël të rrallë, që përmes artit të baletit trajtoi në mënyrë të ndjerë dhe kreative përditshmërinë njerëzore. Performanca u karakterizua nga eleganca skenike, profesionalizmi i lartë i balerinëve dhe mesazhe të thella emocionale që preknin realitete të njohura për publikun.
“’Transformim’, me koreografi nga Driton Sh Saqipi dhe organizuar nga shkolla Prenk Jakova, ishte një përvojë artistike e paharrueshme. Ky spektakël unik bashkoi elegancën, pasionin dhe përkushtimin, duke sjellë në skenë një performancë magjepsëse,” ka thënë ndër të tjera Sibel Halimi, Drejtoreshë e Kulturës në Komunën e Prishtinës në një postim në Facebook.
Kjo shfaqje është dëshmi e përkushtimit të institucioneve komunale për të mbështetur dhe promovuar artin dhe kulturën në kryeqytet.