411 miliardë dollarë do t’i duhen Ukrainës për ta rindërtuar shtetin, ka bërë të ditur Banka Botërore pas vlerësimeve të bëra, pas luftës së nisur në Ukrainë vitin e kaluar.
Këto vlerësime janë bërë një vit pas nisjes së luftës së Rusisë në territorin ukrainas.
Dokumenti që është përpiluar nga Qeveria ukrainase, Banka Botërore, Komisioni Evropian dhe Kombet e Bashkuara, parasheh që Kievi të kërkojë “14 miliardë dollarë për rindërtime kritike më 2023”.
Për t’i përmbushur këto nevoja, Qeverisë ukrainase do t’i duhen 11 miliardë dollarë më shumë sesa që ka paraparë në buxhetin e vitit 2023, transmeton REL.
Lufta e Rusisë në Ukrainë ka ndikuar në zhvendosjen e miliona njerëzve, vdekjen e miliona të tjerëve dhe me rritje globale të çmimeve të ushqimit dhe energjisë.
Më herët të mërkurën, ishte presidenti ukrainas Zelenskyy, ai i cili publikoi momentin e bombardimit të një ndërtese, në të cilën, sipas tij, jetonin njerëz të zakonshëm dhe fëmijë. Ai bëri apel që perëndimi të bashkohet për ta mundur Rusinë më shpejt.
Nga ana tjetër, presidenti rus, Vladimir Putin, e quan luftën si “operacion special ushtarak” për ta çmilitarizuar Ukrainën.
Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.