Banka Qendrore e Rusisë ka rritur ndjeshëm parashikimin për inflacionin në vitin 2026, duke vlerësuar se ai do të arrijë në 6–7%, krahasuar me projeksionin e mëparshëm prej 4.5–5.5%. Sipas institucionit, rritja lidhet kryesisht me shtrenjtimin e karburanteve, pas dëmtimeve të infrastrukturës energjetike ruse.
Në njoftimin e saj, banka thekson se pritjet inflacioniste të familjeve, bizneseve dhe tregjeve financiare janë rritur, gjë që mund ta vështirësojë rikthimin e inflacionit në nivele më të ulëta.
Guvernatorja e Bankës Qendrore, Elvira Nabiullina, e cilësoi situatën si një “goditje të furnizimit”, duke pranuar se çmimet e karburanteve janë rritur ndjeshëm që nga mesi i muajit maj.
Në muajin qershor, disa rajone të Rusisë u përballën me mungesa të karburantit pas sulmeve me dronë të Ukrainës ndaj rafinerive ruse, të cilat Kievi i ka intensifikuar si përgjigje ndaj agresionit ushtarak rus.
Njëkohësisht, Banka Qendrore ka ulur edhe parashikimin për rritjen ekonomike të Rusisë në vitin 2026. Projeksioni për rritjen e Prodhimit të Brendshëm Bruto (PBB) është reduktuar nga 0.5–1.5% në 0.0–1.0%, duke reflektuar pritjet për dobësim të kërkesës dhe ngadalësim të aktivitetit ekonomik.
“Kompanitë presin që kërkesa të ngadalësohet. Duke marrë parasysh kufizimet e përkohshme të kapaciteteve prodhuese, kemi ulur parashikimin për rritjen e ekonomisë”, deklaroi Nabiullina.
Megjithëse autoritetet monetare presin që kapacitetet e prodhimit të karburanteve të rikuperohen gradualisht deri në fund të vitit, analistët paralajmërojnë se sulmet e vazhdueshme ukrainase ndaj rafinerive dhe qendrave logjistike mund të mbajnë presion të lartë mbi inflacionin dhe ekonominë ruse.
Vetëm të shtunën, dronët ukrainas goditën një rafineri nafte në Tyumen, një objekt logjistik në Jekaterinburg dhe një depo karburanti në Rostov mbi Don, duke vazhduar fushatën e sulmeve ndaj infrastrukturës energjetike të Rusisë.