Dy lokacione në Prishtinë janë bastisur nga njësitë policore, në koordinim dhe bashkëpunim me Prokurorinë Speciale të Republikës së Kosovës (PSRK), nën dyshimin për import, eksport, furnizim, transport, prodhim, ndërmjetësim apo shitje të paautorizuar të armëve ose materieve plasëse.
Bastisja është kryer më 9 shtator, ndërsa në rast janë përfshirë tre të dyshuar kosovarë.
“Lidhur me rastin, me datë 09.09.2026 njësitë policore në koordinim dhe bashkëpunim me PSRK-në, kanë bastisur dy lokacione të ndryshme në Prishtinë, nën dyshimin se tre të dyshuar kosovarë janë të përfshirë në kryerjen e veprës së cekur”, thuhet në raportin e Policisë së Kosovës.
Gjatë bastisjeve, policia ka gjetur dhe sekuestruar si dëshmi materiale një revole me karikator, 40 fishekë, dy telefona celularë, si dhe disa dokumente identifikuese dhe kartela bankare.
“Të dyshuarit pas intervistimit, në konsultim me prokurorin janë liruar në procedurë të rregullt”, thuhet në raport.