Komisioni Evropian i ka transferuar buxhetit të Kosovës edhe 5.25 milionë euro për ta ndihmuar në zbutjen e ndikimit të pandemisë COVID-19 dhe rritjen e shpejtë të çmimeve të energjisë dhe ushqimeve.
Siç njofton Zyra e Bashkimit Evropian, ky transferim sjell mbështetjen e drejtpërdrejtë të BE-së për buxhetin e Kosovës në kuadër të kontratës së qëndrueshmërisë të nënshkruar në vitin 2020, në një total prej gati 26 milionë euro.
“Përderisa më e keqja e krizës pandemike është pas nesh, Kosova dhe BE-ja janë prekur nga rritja e çmimeve të ushqimeve dhe energjisë. Përmes kësaj pagese të mbështetjes buxhetore ne ndihmojmë likuiditetin financiar të Kosovës për veprimet e ndërmarra për të mbështetur bizneset e vogla, bujqësinë dhe grupet e cenueshme, duke u përballur me vështirësitë financiare gjatë situatës së vështirë aktuale”, thuhet në njoftim.
Kjo është një formë e mbështetjes së BE-së, përmes së cilës BE-ja shpërblen progresin që bëjnë qeveritë në zbatimin e strategjive të tyre dhe në arritjen e objektivave që i kanë vendosur vetes.
“Pagesa e mëparshme e BE-së në lidhje me kontratën e qëndrueshmërisë ishte 20.5 milionë euro, e disbursuar në dhjetor 2020”, vijon njoftimi.
BE-ja ka inkurajuar Qeverinë e Kosovës që të adresojë dobësitë në sistemin e sigurimeve shoqërore për të synuar më mirë familjet e varfra, disa prej të cilave aktualisht nuk kanë të drejtë për mbështetje.
“Meqenëse të ardhurat e disponueshme zvogëlohen veçanërisht për grupet e cenueshme, alokimet buxhetore për sistemin e asistencës sociale duhet të jenë të orientuara mirë dhe transparente”, thonë nga BE-ja.
Për vitin 2022, buxheti i Kosovës është 2 miliardë e 748 milionë euro.