Bashkimi Evropian ka bërë të ditur se që nga viti 1999 në Kosova ka investuar 3.7 miliardë euro duke u bërë kështu ofruesi më i madh i ndihmës financiare në Kosovë.
Në njoftimin thuhet se kjo ka bërë që BE-ja të jetë edhe partneri më i fortë dhe më i besueshëm i Kosovës, njofton Dukagjini.
“Me 3.7 miliardë euro të investuara në Kosovë që nga viti 1999, BE-ja është ofruesi më i madh i ndihmës financiare dhe partneri më i fortë dhe më i besueshëm. BE-ja po ndihmon në zhvillimin e ekonomisë, forcimin e sundimit të ligjit, përmirësimin e cilësisë së arsimit, kujdesit shëndetësor dhe infrastrukturës, avancimin e mbrojtjes së mjedisit dhe energjisë së qëndrueshme dhe promovimin e kulturës”.
Tutje thuhet se mbështetja e BE-së ka bërë një ndryshim në jetën e qytetarëve teksa theksohet mbështetja e vazhdueshme.
“Mbështetja e BE-së po bën një ndryshim të vërtetë në jetën e njerëzve, duke ndihmuar në ndërtimin e një të ardhmeje më të ndritur për të gjithë. Në çdo hap, BE-ja është në krahun tuaj, duke mbështetur progresin dhe duke ofruar mundësi”, thuhet në njoftim.