Bashkimi Evropian (BE) ka dënuar ashpër sulmin mbi kanalin e ujit të Ibër Lepencitn ë afërsi të Zubin Potokut në veri të Kosovës.

BE përmes një komunikate ka thënë se dënojnë ashpër sulmin terrorist të kryer të premten.

‘’Është një akt i neveritshëm sabotimi në infrastrukturën kritike civile të Kosovës, e cila siguron ujë të pijshëm për një pjesë të konsiderueshme të popullsisë së Kosovës dhe është një komponent jetik i sistemit energjetik të Kosovës’’, thuhet në komunikatë.

Tutje BE ka ofruar mbështetjen e saj Prishtinës zyrtare.

‘’BE-ja u ka ofruar mbështetje autoriteteve të Kosovës dhe vazhdon të koordinojë hapat e ardhshëm me partnerët përkatës, duke përfshirë edhe KFOR-in në nivel lokal. Misioni civil i BE-së për sundimin e ligjit EULEX po ofron ndihmë për autoritetet e Kosovës në përputhje me mandatin e tij’’.

‘’Ne qëndrojmë në solidaritet me të gjithë ata në mbarë Kosovën që janë prekur nga sulmi. Këto mesazhe solidariteti dhe mbështetje ia kam përcjellë drejtpërdrejt kryeministrit Albin Kurti pasditen e sotme’’, thuhet në komunikatë.

BE ka thënë se veprimet kriminale përveq që duhet hetuar, autorët e sulmit duhet të dalin para drejtësisë.

‘’Veprimi kriminal i kryer në Zubin Potok duhet të hetohet dhe autorët e tij të sillen para drejtësisë. Në këtë aspekt, BE-ja u bën thirrje të gjitha palëve të interesuara që të bashkëpunojnë plotësisht me autoritetet e Kosovës dhe do të vazhdojnë të ndjekin nga afër zhvillimet’’, thuhet në komunikatë.