Bashkimi Evropian ka ftuar liderët politikë të Kosovës dhe Serbisë që menjëherë t’i japin fund retorikës nxitëse dhe të veprojnë me përgjegjësi, gjersa ka theksuar se për çfarëdo përshkallëzimi të situatave në vend, do të mbajnë për përgjegjës politikanët e lartë të të dyja palëve.
Kështu thuhet në deklaratën e 14 gushtit të BE-së, dërguar nga zëdhënësi, Peter Stano, duke theksuar se BE ka shprehur shqetësim për deklaratat në të cilat përmenden lufta dhe konflikti.
“Rritja e retorikës nxitëse kohëve të fundit nga ana e zyrtarëve të Kosovës dhe Serbisë, në veçanti deklaratat rreth luftës dhe konfliktit në Ballkanin Perëndimorë paraqesin shqetësim të madh. Politikanët e lartë nga të dyja palët do të mbahen përgjegjës për çfarëdo përshkallëzimi që mund të çojë deri te ndonjë rritje të tensioneve dhe potencialisht në dhunë në rajon”, thuhet në këtë deklaratë, transmeton REL.
Ndër të tjera, siç thuhet në deklaratë, të dyja palët duhet “menjëherë t’i japin fund armiqësive mes tyre dhe deklaratave nxitëse, si dhe të veprojnë me përgjegjësi”.
Se a do të ketë marrëveshje të re në takimin Kurti-Vuçiq, kishte folur vetë Stano për Portalin Dukagjini.
“Si rregull i përgjithshëm, ne nuk komentojmë spekulime në media dhe nuk paraprijmë takimet që organizojmë me spekulime për një rezultat të mundshëm”, ka thënë Stano për Portali Dukagjini.
Kryeministri i Kosovës, Albin Kurti dhe Presidenti i Serbisë, Aleksandar Vuçiq do të takohen në Bruksel më 18 gusht.
Ky takim vjen si rrjedhojë e tensioneve në Veri të Mitrovicës pas dy vendimeve për reciprocitet mes Kosovës dhe Serbisë.
A do të ketë marrëveshje të re në takimin Kurti-Vuçiq, flet Stano për Portali Dukagjini