Kryeprokurori i deritanishëm i Shtetit, Aleksandër Lumezi, ia ka dorëzuar detyrën U.D. Kryeprokurorit të Shtetit, Besim Kelmendi.
Në ceremoninë e pranim-dorëzimit, kanë marrë pjesë, Kryesuesi, zëvendëskryesuesi i Këshillit Prokurorial të Kosovës dhe U.D. Drejtori i Sekretariatit të KPK-së.
“Kryeprokurori i deritanishëm Lumezi, i ka uruar suksese dhe mbarësi U.D. Kryeprokurorit Kelmendi, në ushtrimin e detyrave kushtetuese dhe ligjore gjatë udhëheqjes së institucionit të Prokurorit të Shtetit. Ndërsa, U.D. Kryeprokurori Kelmendi, ka falënderuar Kryeprokurorin e deritanishëm, Aleksandër Lumezi, për punën, angazhimin dhe profesionalizmin e treguar përgjatë ushtrimit të mandatit kushtetues si Kryeprokuror i Shtetit i Republikës së Kosovës”, thuhet në njoftim.
Ky pranim-dorëzim vjen pas përfundimit të mandatit kushtetues shtatë (7) vjeçar të Kryeprokurorit të deritanishëm të Shtetit, Aleksandër Lumezi, i cili ishte emëruar në këtë pozitë më 21 prill 2015.
Më 6 prill të këtij viti, KPK kishte votuar Blerim Isufaj për Kryeprokuror të ri të Shtetit. Ai ishte vlerësuar me 98 pikë, duke u bërë kandidati më i votuar për këtë pozitë.
Isufaj, nga KPK-ja, është propozuar për dekretim te presidentja e Republikës së Kosovës, Vjosa Osmani.
Në lidhje me zgjedhjen e Isufajt, kishte reaguar Bashkimi Evropian si dhe organizatat joqeveritare vendore, të cilat kishin shprehur dyshimet e tyre për mënyrën e përzgjedhjes së tij.
Presidentja Vjosa Osmani, së fundi kishte organizuar një takim me OJQ-të, për të diskutuar në lidhje me përzgjedhjen e kryeprokurorit të ri.