Në rrjetet sociale kanë qarkulluar informacione të paverifikuara për një sulm të mundshëm terrorist në linjat 2 dhe 6 të metrosë së Brukselit, që duhet të ndodhë të mërkurën.
Siç shkruan Brussels Times, Qendra Kombëtare Belge e Krizave ka konfirmuar se kërcënimi çoi në kujdes të shtuar, por megjithatë deklaroi se “elementë të ndryshëm tregojnë se nuk ka gjasa për ndonjë sulm”.
Kërcënimet janë dërguar në dy E-mail dërguar Komisionit Evropian më 16 shkurt dhe 3 mars.
Autori i mesazhit, të shkruar në rusisht, ka thënë se “në dritën e politikës së vazhdueshme agresive të BE-së, po paralajmërohen për sulme të mëdha terroriste në territorin e BE-së”.
Qendra Kombëtare e Krizave të Belgjikës më pas konfirmoi se përmbajtja e emailit ishte shqyrtuar nga autoritete të ndryshme, duke arritur në përfundimin se një sulm i mundshëm nuk kishte gjasa.
Policia belge kontrolloi vendet e synuara dhe nuk zbuloi asnjë kërcënim.
Madje, janë shtuar edhe patrullat e policisë.
Sistemi i transportit publik në kryeqytetin belg ishte tashmë objektiv i një sulmi në vitin 2016, kur një sulmues vetëvrasës la të vdekur 20 persona.