Kryetari i Partisë Përparimtare Serbe (SNS), Millosh Vuçeviç, ka reaguar ndaj nismës në Malin e Zi për shpalljen e 11 korrikut si “Ditë e Përkujtimit të Viktimave të Gjenocidit në Srebrenicë”, duke e paraqitur këtë iniciativë si një veprim kundër popullit serb.
Në një deklaratë të publikuar në rrjetet sociale, Vuçeviç kritikoi autoritetet malazeze, duke pretenduar se ato po ndjekin politika “kundër interesave të serbëve” dhe duke i akuzuar për diskriminim ndaj qytetarëve serbë.
“Ata vazhdojnë të ndalojnë hyrjen e qytetarëve serbë, vazhdojnë të persekutojnë serbët, ndalojnë gjuhën serbe dhe flamurin trengjyrësh… e gjithë kjo është e trishtueshme dhe hipokrite për një vend që supozohet se mbron vlerat evropiane. Tani ata po nisin përsëri një iniciativë për të shpallur 11 korrikun si Ditën e Përkujtimit për viktimat e gjenocidit të supozuar në Srebrenicë, duke i vënë vulën e gjenocidit popullit serb”, njoftoi Vučević në Instagramin e tij.