Sali Berisha, ish presidenti i Shqipërisë ka braktisur seancën për votimin e presidentit të Shqipërisë, ku sipas tij, në këto zgjedhje është duke u kryer një dhunim i shëmtuar i Kushtetutës së vendit.
‘’Sot, në parlament po kryhet një dhunim i shëmtuar i kushtetutës së vendit, një akt anti-kushtetues, ku po votohet në shkelje flagrante për president republike, njeriu që kalon nga karrigia e shefit të shtabit në karrigen e kreut të shtetit, duke shkelur në mënyrën më të hapur nenin 167 të kushtetutës, sipas të cilit, ushtaraku aktiv nuk mund të zgjidhet në organe të tjera përveç ushtrisë’’, ka thënë ish presidenti i Shqipërisë, Sali Berisha.
‘’Pretendimi se dha dorëheqjen ka zero vlerë sepse për ushtarakun jo dorëheqja, por miratimi dhe lirimi nga detyra është rruga që e çliron nga obligimet ushtarake. Dorëheqja është e pavlerë’’, shtoi Berisha.
‘’Unë po flas për fillimin. Z.Meta i është dërguar ç’dekretimi i kandidatit. Ai nuk ka shkuar aty për asnjë arsye veç se si kandidat për president.
Në historinë e botës së lirë, ju kurrë nuk do të gjeni një rast të vetëm kur një person kalon nga karrigia e Shefit të Shtabit në atë të presidentit, kjo mund të ndodhë vetëm në Junta, në puce e grushte shteti. Kjo procedurë, është shumë e rrezikshme për vendin, sepse i hap shteg që çdo shef shtabi të aspirojë të kapë kreun e shtetit, duke shfrytëzuar këtë precedent”, tha Sali Berisha në një prononcim për media, raporton Top Chanel.