Zëvendësministri i Punëve të Jashtme, Anton Berisha, ka kritikuar presidenten e Kosovës, Vjosa Osmani, dhe kryeministrin Albin Kurti për “politikën e tyre populiste”, duke i akuzuar ata për izolimin e vendit në një kontekst të ndërlikuar gjeopolitik.
Në një postim në Facebook, Berisha ka theksuar se vendimi i tyre për të zhvilluar politika populiste për të fituar vota ka çuar në izolimin e Kosovës dhe ka sjellë koncesione të mëdha.
Ai, gjithashtu, ka kritikuar mënyrën sesi çështja e Asociacionit është trajtuar, duke thënë se në vend që të shfrytëzohej në kontekstin e anëtarësimit në NATO dhe të aplikimit për në BE, politika e tyre infantile ka bërë që Asociacioni të jetë kusht për anëtarësim në Këshillin e Evropës.
“Kështu, në vend që tema e Asociacionit të shfrytëzohej në kontekstin e anëtarësimit në NATO dhe aplikimit për në BE, ajo tash falë kësaj politike infantile të targave, dinarit e problemeve te tjera krejt artificiale te krijuara nga qeveria e Kosovës ne veri, e kane sjellë punën që Asociacioni do te jetë kusht për anëtarësim në Këshillin e Evropës”, ka shkruar ai në Facebook.
Berisha ka vlerësuar se anëtarësimi i Kosovës në KiE duhej të ndodhte në rrugë normale dhe të pakushtëzuar.