Në seancën e së enjtes, deputeti nga radhët e Lidhjes Demokratike të Kosovës, Besian Mustafa e ka kritikuar pushtetin për mos përfshirjen e kategorisë së bujqëve në përfitimin e 100 eurove që ka vendosur t’i ndajë Qeveria e Kosovës.
Mustafa ka thënë me këtë rast bujqit janë konsideruar si të papunë dhe si rrjedhojë nuk do të mund t’i marrin 100 euro sikurse kategoritë e tjera.
“Fare në fund, ështrë mjaft shqetësuese që në këtë masën 100 euro i keni konsideruar bujqit si të papunë, duke mos i përfshirë në këtë masë. Bujqit nuk do t’i marrin 100 euro për muajin prill”, ka thënë Mustafa.
Shqetësim tjetër sipas tij është edhe mos hapja e programit për pagesa direkte ndaj bujqve. Ai i ka drejtuar pyetje Qeverisë së Kosovës dhe Ministrisë së Bujqësisë, për datën se kur do të shpallja e programit për pagesa direkte.
“Do doja të dija, u bëj thirrje edhe Qeverisë dhe Ministrisë, se kur do të bëhet hapja për aplikim për pagesa direkte, pastaj kur do të përfundohet kontrolli administrativ i këtyre aplikimeve, kur do të bëhet kontrolla në teren, dhe kur do të bëhet ekzekutimi i pagesave”, ka thënë ai.
Sipas deputetit të LDK-së, është dashur më herët që të hapej kjo shpallje në mënyrë që të ndihmohen bujqit.