Presidenti i Shteteve të Bashkuara të Amerikës (SHBA), Joe Biden, ka mbrojtur “vendimin e tij shumë të vështirë” për t’i dhënë Ukrainës bomba thërrmuese, të cilat kanë një histori të vrasjes së civilëve.
Biden tha se iu desh një kohë për ta bindur veten për marrjen e këtij vendimi, por që një i tillë vinte pasi ukrainasve po u mbarojnë municionet.
Bombat thërrmuese janë të ndaluara nga më shumë se 120 vende të botës.
Në një intervistë për CNN të premten, Biden deklaroi se një vendim i tillë erdhi pas një koordinimi me aletatët, një diskutim në prag të një samiti të NATO-s në Lituani javën e ardhshme.
Këshilltari i Sigurisë Kombëtare, Jake Sullivan, tha në konferencën e përditshme të Shtëpisë së Bardhë të së premtes se zyrtarët “e pranojnë se municionet thërrmuese krijojnë një rrezik të dëmtimit të civilëve” nga bombat e pashpërthyera.
“Kjo është arsyeja pse ne e kemi shtyrë vendimin për aq kohë sa mundëm”, tha ai, transmeton BBC.
Sullivan tha se Ukrainës po i mbaronte artileria dhe kishte nevojë për furnizime, ndërsa SHBA-ja rrit prodhimin vendas.
“Ne nuk do ta lëmë Ukrainën të pambrojtur në asnjë moment në këtë periudhë konflikti,” tha ai.
Municionet kanë shkaktuar polemika mbi shkallën e dështimit të tyre, që do të thotë se bombat e vogla të pashpërthyera mund të qëndrojnë në tokë për vite dhe pa dallim të shpërthejnë më vonë.
Sullivan u tha gazetarëve se bombat thërrmuese amerikane që dërgoheshin në Ukrainë ishin shumë më të sigurta se ato që ai tha se tashmë po përdoreshin nga Rusia në konflikt.
Masa e Biden-it do të anashkalojë ligjin amerikan që ndalon prodhimin, përdorimin ose transferimin e municioneve thërrmuese me një shkallë dështimi prej më shumë se 1%.
Në fillim të luftës, kur Shtëpia e Bardhë u pyet për pretendimet se Rusia po përdorte bomba thërrmuese dhe vakum, sekretari i atëhershëm i shtypit tha se do të ishte një “krim lufte” i mundshëm nëse ishte i vërtetë.
Më shumë se 120 vende janë zotuar ndaj Konventës për Municionet Thërrmuese, duke rënë dakord të mos përdorin, prodhojnë, transferojnë ose ruajnë pajisje të tilla. SHBA-ja, Ukraina dhe Rusia nuk janë palë në marrëveshje.
Gjermania, e cila ka nënshkruar traktatin e ndalimit, tha se nuk do t’i jepte bomba të tilla Ukrainës, por shprehu mirëkuptim për qëndrimin amerikan.