Presidenti Joe Biden ka thënë se presidenti ukrainas, Volodymyr Zelenskyy “nuk donte ta dëgjonte”, kur inteligjenca amerikane kishte informacione se Rusia po përgatitej ta pushtonte vendin e tij.
Komentet erdhën derisa Biden po fliste për punën e tij për forcimin e Ukrainës, ku janë bërë katër muaj prej që ka filluar lufta.
“Asgjë e tillë nuk ka ndodhur që nga Lufta e Dytë Botërore. E di që shumë njerëz menduan se ndoshta po e ekzagjeroja. Por e dija se kishim të dhëna për të mbështetur se ai (Presidenti rus Vladimir Putin) do të hynte brenda, jashtë kufirit”, u tha Biden donatorëve demokratë në Los Anxhelos.
“Nuk kishte asnjë dyshim. Dhe Zelenskyy nuk donte ta dëgjonte”, tha Biden, raporton AP.
Zelenskyy ka frymëzuar njerëzit me udhëheqjen e tij gjatë luftës, megjithatë përgatitja e tij për pushtimin ka mbetur një çështje e diskutueshme.
Zyrtarët e administratës së Biden e paralajmëruan vazhdimisht se një pushtim rus ishte shumë i mundshëm.
Në atë kohë Zelenskyy ishte gjithashtu i shqetësuar se paralajmërimet për luftë po e dëmtonin ekonominë e brishtë të Ukrainës.