Një pjesë e fasadës së një ndërtese në rrugën “UÇK” në Prishtinë ka rënë në tokë.
Raportohet se nuk ka pasur të lënduar, pasi ekipet e zjarrfikësve kanë reaguar menjëherë për të siguruar zonën.
Inspektorët e Komunës së Prishtinës janë gjithashtu të pranishëm në vendin e ngjarjes për të ndihmuar në menaxhimin e situatës.
Bashkim Zeneli, udhëheqës i skuadrës së zjarrfikësve “Prishtina 2”, ka raportuar se ata kanë marrë thirrje në mëngjes për rënien e fasadës, dhe kanë reaguar menjëherë për të parandaluar rreziqet për qytetarët.
Megjithatë, ai ka kritikuar Policinë për moslargimin e patrullës së tyre nga vendi i ngjarjes, duke shtuar se kjo i ka detyruar të merren edhe me trafikun.
“Ne jemi në këtë intervenim dhe udhëheq të incidentit. Në orën 9:25 kemi pranu thirrje që është duke ra fasada nga banesat, që është duke rrezikuar qytetarët dhe menjëherë kemi dalë menjëherë në vendin e ngjarjes. Diku rreth 70% të punës e kemi kry, kurse nga hyrja tjetër nuk kemi pasur qasje, sepse nuk është banesa e pabanueshme. E kryem intervenimin çka ishte në rrezik me ra fasada”, ka deklaruar Zeneli për EO.
Lulzim Fushtica, drejtori për Siguri dhe Emergjenca në Komunën e Prishtinës, ka bërë të ditur se ekipet emergjente janë në vendin e ngjarjes për të eliminuar rrezikun dhe për të siguruar që zona të pastrohet.
“Është një incident që ka ndodhur sot në mëngjes. Me marrjen e informatës ekipet emergjente të kryeqytetit janë dalë në vendin e ngjarjes. Inspektorët dhe shërbimi i zjarrfikësve e kemi eleminu rrezikun. Një pjesë e fasadës si pasojë e shirave ka ra. Është eleminu rreziku dhe do ta pastrojmë ta kthejmë në gjendjen e mëparshme”, ka thënë Fushtica.
Ai, gjithashtu, ka premtuar monitorimin e vazhdueshëm të kësaj zone dhe të tjera të qytetit, për të parandaluar ngjarje të ngjashme në të ardhmen.