Zëvendëskryeministri i Kosovës, Besnik Bislimi, ka publikuar një grafikë, ku, sipas tij, Banka Evropiane për Rindërtim dhe Zhvillim (BERZH) e ka gjetur Kosovën si vendin me rritjen ekonomike më të lartë në rajon.
Me anë të një postimi në Twitter, Bislimi ka thënë se qëllimi i ekzekutivit është të zvogëlohen pabarazitë dhe të ketë shpërndarje të barabartë për të gjithë qytetarët.
“Këto rezultate nuk janë të rastësishme. Trajektorja në të cilën e kemi drejtuar vendin është ajo e duhura, ku do të shohim përfitimet në vitet në vijim. Qëllimi ynë është që kjo rritje të jetë e qëndrueshme. Të zvogëlohen pabarazitë dhe të ketë shpërndarje të barabartë për të gjithë qytetarët”, ka shkruar ai.
Bislimi ka theksuar se Banka Botërore dhe FMN-ja e kanë vlerësuar, gjithashtu, vendin për rritjen ekonomike dhe trendin pozitiv.
“Së fundmi, BERZH e gjeti Kosovën si vendin me rritjen ekonomike më të lartë në rajon për vitin 2023. Ajo parashikon që ky trend të vazhdojë edhe në të ardhmen e afërt”, shtoi ai.
These results are not casual. The trajectory in which we have directed the country is the right one, where we will see the benefits in the coming years. Our goal is for this growth to be sustainable. To reduce inequalities and have equal distribution for all citizens.
— Besnik Bislimi (@BislimiBesnik) May 18, 2023
Ndryshe, Qeveria e Kosovës ka nënshkruar marrëveshje në vlerë gjashtë milionë e 315 mijë euro me Bankën Evropiane për Rindërtim dhe Zhvillim, me synim për investime në efiçiencën e energjisë së ndërtesave publike në Prizren, prej të cilave 20 për qind e shumës është grant.
Ky projekt, i cili financohet nga kjo marrëveshje, parasheh implementimin e masave të efiçiencës në 100 objekte komunale, duke përfshirë kopshte, shkolla dhe qendra të kujdesit shëndetësor parësor.
Masat e propozuara për efiçiencë përfshijnë, përmirësimin dhe ndërrimin e sistemeve të ngrohjes, izolimin termik të ndërtesave dhe instalimin e dritareve dhe dyerve me efiçiencë të energjisë, sipas njoftimit nga Ministria e Financave Punës dhe Transfereve.