Zëvëndëskryeministri Besnik Bislimi ka munguar në mbledhjen e Komisionit për Integrime Evropiane.
Në këtë komision, Bislimi supozohej të raportonte mbi zhvillimet e fundit në dialogun Kosovë-Serbi. Sipas kryesueses Rrezarta Krasniqi, Bislimi kishte konfirmuar pjesëmarrjen një ditë më parë.
Ndonëse nuk ishte prezent fizikisht në të, në dhomën e komisionit Bislimi u shfaq me anë të fotove.
Në dhomën ku parashihej të mbahej mbledhja, janë vendosur foto të momentit të përleshjes në Kuvend, përkatësisht, momenti kur Bislimi goditi me shishe deputetin nga radhët e PDK-së, Mërgim Lushtaku.
Teksa kryeministri i Kosovës, Albin Kurti, po fliste në foltoren e Kuvendit të Kosovës, ai është sulmuar nga deputetët e opozitës.
Ky reagim i opozitës erdhi pasi zëvendëskryeministri Besnik Bislimi ka larguar fotografinë e vendosur në foltore nga deputetja e PDK-së, Ganimete Musliu.
Kurti është spërkatur fillimisht me ujë nga deputeti i PDK-së, Mergim Lushtaku, e më pas filloi përleshja në mes të deputetëve të opozitës dhe atyre të pushtetit.
Në këtë kohë zëvendëskryeministri Besnik Bislimi e ka goditur deputetin Lushtaku me shishe të ujit në fytyrë, ku më pas deputetët e pushtetit e të opozitës janë përfshirë në rrahje.
Mbrojtja e afërt e kryeministrit Kurti ka ndërhyrë menjëherë, ndërsa kuvendi shkon në pauzë për 30 minuta.