Ish-kryeministri i Britanisë së Madhe, Boris Johnson, ka deklaruar se presidenti rus, Vladimir Putin, e ka kërcënuar atë me një sulm raketor në një telefonatë “të jashtëzakonshme”, në prag të pushtimit rus në Ukrainë.
Johnson është shprehur se Putin gjatë bisedës telefonike i kishte thënë atij se “do mjaftonte vetëm një minutë”.
Siç shkruan BBC, Johnson ka thënë se komenti u bë pasi ai paralajmëroi se lufta do të ishte një “katastrofë e plotë”, gjatë një telefonate “shumë të gjatë” në shkurt të vitit 2022.
Detajet e shkëmbimit janë zbuluar në një dokumentar të BBC-së, i cili shqyrton ndërveprimet e Putinit me liderët botërorë.
Johnson e paralajmëroi Putinin se pushtimi i Ukrainës do të çonte në sanksione perëndimore dhe më shumë trupa të NATO-s në kufijtë e Rusisë.
Ai gjithashtu u përpoq të pengonte veprimet ushtarake ruse, duke i thënë Putin se Ukraina nuk do të bashkohej me NATO-n “për të ardhmen e parashikueshme”.
Por, Johnson ka thënë “ai më kërcënoi në një moment dhe më tha ‘Boris, nuk dua të të lëndoj, por me një raketë, do të duhej vetëm një minutë’, ose diçka e tillë”.
“Por unë mendoj se nga toni shumë i qetë që ai po përdorte, ai thjesht po luante së bashku me përpjekjet e mia për ta detyruar atë të negocionte”, ka thënë Johnson.