Përfaqësuesi i lartë i Bashkimit Evropian për Politikë të Jashtme e Siguri, Josep Borrell, pas takimit me kryeministrin e Shqipërisë, Edi Rama, e ka falënderuar atë për përpjekjet që po bën për të gjetur zgjidhje, pas rritjes së tensioneve në mes të Kosovës dhe Serbisë.
“Pashmangshëm, diskutuam për dialogun e lehtësuar nga Bashkimi Evropian ndërmjet Beogradit e Prishtinës, dhe ju falënderoj juve z.kryeministër për përpjekjet dhe mbështetjen, në tentimet për të gjetur zgjidhje”, ka thënë Borrell.
Ai tutje e ka bërë të qartë se këto përpjekje për zgjidhje janë gjithashtu edhe qëndrim i vendeve anëtare, pas takimit të djeshëm të ministrave të Jashtëm në Luksemburg, ku është theksuar se palët duhet të depërshkallëzojnë situatën dhe të gjejnë një rrugë përpara, duke u bazuar në udhërrëfyesin evropian që u është propozuar në takimet e javës së kaluar në Bruksel.
“U pajtuam që situata thërret për lëvizje të shpejta, depërshkallëzim dhe gjetjen e menjëhershme të zgjidhjeve, dhe ju them se vendet anëtare pajtohen për natyrën urgjente të kësaj dhe janë duke e humbur durimin përballë situatës që po vazhdon të përkeqësohet dhe që kërkon hapa të menjëhershëm”, ka vijuar Borrell.
Ndryshe, tensionet në veri janë rritur që nga 26 maji, kur kryetarët e rinj shqiptarë të komunave në veri – të banuara me shumicë serbe – kanë hyrë në ndërtesat komunale të Zveçanit, të Leposaviqit dhe të Zubin Potokut.
Popullata serbe, e cila i ka bojkotuar zgjedhjet, ka kundërshtuar veprimin e kryetarëve dhe ka mbajtur vazhdimisht protesta para ndërtesave.
Komuniteti ndërkombëtar ka kërkuar nga Kosova dhe Serbia që t’i ulin urgjentisht tensionet dhe që të organizohen zgjedhje të reja në veri.