Përfaqësuesi i lartë i Bashkimit Evropian për Politikë të Jashtme, Josep Borrel, ka thënë se është hera e parë në histori që mbahet Këshilli i Stabilizim Asociimit në Tiranë, që sipas tij, populli shqiptar duhet ta marrë si mesazh se BE-ja është afër tyre.
Sipas Borrellit, zakonisht këto mbledhje të rëndësishme vjetore mbahen “në Bruksel ose në Luksemburg, por sot jemi në Tiranë për t’i treguar popullit shqiptar që jemi gjithnjë e më tepër pranë jush”.
Më tej, ai ka thënë se me kryeministrin e Shqipërisë, Edi Rama, kanë rënë dakord që qeveria e Shqipërisë të tërhiqet nga projekti i pasaportës së artë.
“Ne patëm mundësinë të mirëpresim deklaratën e zotit kryeministër që skema e pasaportave të arta nuk do të ndiqet më tej dhe kemi trajtuar çështje të tjera në mbledhjen tonë, sidomos polarizimet e forta të mjedisit politik në vend dhe shumë çështje të tjera të cilat do t’i diskutojë në detaje komisioneri Varhelyi”, ka thënë Borrelli.
Ndërkohë, Borrell e ka përfunduar duke e përgëzuar Shqipërinë për reformën në drejtësi.