Policia e Kosovës ka parandaluar dy raste të kontrabandimit me mallra të shtunën e 19 nëntorit.
“Policia e Kosovës në vazhdën e zbatimit të masave për parandalim dhe luftimin e paligjshmërisë dhe kontrabandës, kanë intensifikuar kontrollet operativo-taktike në teren, ku në dy raste të ndara kanë parandaluar futjen e mallrave të kontrabanduara në Republikën e Kosovës”, shkruhet në Facebook.
Parandalimi i rastit të parë ka ndodhur gjatë mesditës në fshatin Komogllav ku njësia policore e taskë forcës nga Drejtoria Rajonale e Policisë Kufitare Lindje ka vërejtur duke qarkulluar në rrugë automjetin e dyshuar Opel Astra.
Ndërsa gjatë kontrollit është vërenjtur se kishte të ngarkuar Mjaltë për të cilën i dyshuari nuk kishte asnjë dokument për origjinën dhe përmbajtjen e saj.
“Në total kanë qenë 37 paketime me nga 12 kavanoza me peshë nga 720Gr”, thuhet në njoftim.
Rasti i dytë ka ndodhur në pikën e kalimit kufitar Dheu i Bardhë, ku zyrtarët policorë pas dyshimit të shfaqur kanë ndërmarrë masa të nevojshme duke bërë profilizimin dhe kontrollin në vijën e dytë të një veture dhe si rezultat i kësaj është parandaluar një rast i futjes ilegale të mallrave me akcizë – pijeve aloolike.
Gjatë kontrollit në automjet janë gjetur pije alkoolike të llojit Zhollta, Ouzo Tsantali dhe Stomaklia.
Ndërkaq pas kryerjes së procedurave fillestare, rasti është proceduar nga Dogana e Kosovës.