Bashkimi i Sindikatave të Pavarura të Kosovës, e ka mirëpritur vendimin e Qeverisë së Kosovës, të marrë në mbledhjen e fundit për vazhdimin e shtesës prej 50 eurove për punëtorët e sektorit publikë si dhe shtesën prej 60 eurove për të punësuarit në Sektorin e Shëndetësisë.
Në njoftimin e tyre, BSPK ka thënë se kjo ka qenë kërkesë e vazhdueshme e tyre.
“BSPK vazhdueshëm e edhe në takimin e fundit me Partnerin Social – Qeverinë pat kërkuar dhe diskutuar për përkrahjen e duhur parimore të Sektorit Publik duke ua dhënë rolin e duhur dhe meritor të punësuarve në Sektorin Publik, e sidomos për vazhdimin e shtesës për përballje me inflacionin edhe në 2023-ën, dhe për përmbylljen si duhet të Ligjit të pagave për sektorin publik me një koeficient vlera monetare e të cilit e vlerëson punën dhe djersën e punëtorit, e po ashtu edhe për nënshkrimin e Marrëveshjes së Përgjithshme Kolektive të Sektorit Publik”, thuhet në njoftim.
BSPK shpreson që Qeveria e Kosovës, t’i përmbushë edhe zotimet e tjera ndaj punëtorëve të sektorit publikë, në mënyrë që të krijohet një mjedis i mirë me mirëqenie si duhet ekonomike e sociale.