Kryetari i Podujevës, Shpejtim Bulliqi, ka bërë të ditur se për shkak të reshjeve të dendura të shiut gjatë ditëve të fundit, disa zona në Komunën e Podujevës janë duke u përballur me vërshime, si Pakashticë, Kërpimeh, Letanc, Peran dhe Obrançë.
Për menaxhimin e kësaj situate, Bulliqi ka thënë se si institucione lokale së bashku me katër ekipe, që nga mëngjesi janë në terren duke intervenuar në këto zona.
“Zonat më të prekuara janë; Pakashticë, Kërpimeh, Letanc, Peran dhe Obrançë, po ashtu edhe disa rrugë janë përshkuar nga uji, duke vështirësuar qarkullimin në komunikacion. Situata është e menaxhueshme, por me tendencë të përkeqësimit për shkak të reshjeve të pandërprera të shiut”, ka shkruar Bulliqi në Facebook.
Ai ka bërë të ditur se edhe disa rrugë janë përshkuar nga uji, duke vështirësuar qarkullimin në komunikacion.
“Apeloj te të gjithë qytetarët të bashkëpunojnë me ekipet emergjente institucionale, në mënyrë që përmes koordinimit të përbashkët të tejkalohet sa më shpejt kjo situatë”, ka vijuar Bulliqi.