Ish-kryetari i Kuvendit, Jakup Krasniqi, vazhdon të jetë ende në paraburgim në Hagë, pas aktakuzës së ngritur nga Gjykata Speciale dhe fillimit të gjykimit ndaj tij dhe ish-krerëve të tjerë të UÇK-së.
Krasniqi ka shkruar disa vargje poetike gjatë qëndrimit të tij në qeli të burgut në Hagë. E këto vargje, i ka publikuar vajza e tij, Gresë Krasniqi në rrjetin social Facebook.
“Burgu im qenka një vrimë.
Qiell e diell i shoh copë-copë.
Aty ku bie e zgjohem përditë.
Për mua është vetëm një gropë.
Veçmas për këtë moshë”, janë vargjet që ka shkruar Jakup Krasniqi.
Gjykimi ndaj ish-krerëve të Ushtrisë Çlirimtare të Kosovës (UÇK) është duke vazhduar në Hagë.
Hashim Thaçi, Kadri Veseli, Rexhep Selimi dhe Jakup Krasnqi janë deklaruar të pafajshëm.
Ata po mbahen në paraburgim në Hagë që nga viti 2020.
Sipas aktakuzës, krimet e paraqitura në të u kryen më së paku prej marsit 1998 deri në shtator 1999 në disa vendndodhje në Kosovë, si edhe në Kukës dhe Cahan, në Shqipërinë Veriore.
Më 10 maj 2022, gjatë paraqitjeve të tyre, të katër të akuzuarit u vetëdeklaruan të pafajshëm lidhur me akuzat e reja në aktakuzën e ndryshuar.