Andy Burnham, kryetari aktual i rajonit Greater Manchester nga Partia Laburiste ka hapur një përballje të mundshme me kryeministrin britanik Keir Starmer, pasi ka fituar bindshëm zgjedhjet e pjesshme në Makerfield, duke marrë 55% të votave dhe një shumicë dukshëm më të madhe se paraardhësi i tij Josh Simons.
Fitorja e tij ka ndezur diskutime brenda Partisë Laburiste se Burnham mund të rikthehet në Westminster dhe madje të sfidojë Starmer për udhëheqjen e partisë, me disa zëra që shkojnë deri te mundësia e zëvendësimit të kryeministrit brenda një periudhe të shkurtër.
Në fjalimin e fitores, Burnham tha se rezultati “mund të jetë një pikë kthese”, duke shtuar se qytetarët “kanë votuar për ndryshim dhe për më shumë pushtet për veriun dhe zonat e harruara nga Westminsteri”.
Ai e cilësoi situatën si “shansin e fundit” për Laburistët, duke paralajmëruar: “Nuk do të ketë një mundësi të dytë, por tani është koha për të ndërtuar një politikë të re të bazuar në unitet dhe shpresë, duke u larguar nga një politikë e ndarë si ajo që shohim në Shtetet e Bashkuara.”
Ndërkohë, figura të larta të Laburistëve po kërkojnë që të hapet një proces për transferim pushteti ose një garë e përshpejtuar për lidershipin e partisë, raporton The Guardian.
Ish-zëvendëskryetarja e Laburistëve, Harriet Harman, propozoi që Starmer, Burnham dhe Wes Streeting të takohen dhe të bien dakord për një proces ku deputetët e partisë të vendosin për udhëheqjen.
Edhe deputeti Patrick Hurley i bëri thirrje kryeministrit të largohet, duke thënë se “vullneti i grupit parlamentar është i qartë” dhe se nevojitet një tranzicion i shpejtë.