Analisti Ardian Bytyqi ka deklaruar se sfida kryesore për krijimin e institucioneve nuk qëndron te zgjedhja e Kuvendit apo e Qeverisë, por te sigurimi i votave për zgjedhjen e presidentit të Kosovës.
Duke folur në emisionin “Debat Plus” në TV Dukagjini, Bytyqi tha se mbetet e paqartë nëse Lidhja Demokratike e Kosovës (LDK) do të jetë e unifikuar në rast të një marrëveshjeje politike me Lëvizjen Vetëvendosje (LVV).
“Në fakt, sa u përket numrave për Kuvendin dhe Qeverinë, LVV-ja i ka numrat, ndërsa çështja është te presidenti. Na bën skeptikë se çka do të prodhojë një marrëveshje politike mes LDK-së dhe LVV-së, kur kemi një LDK që në asnjë formë nuk mund të tregojë se sa do të jetë e unifikuar rreth kërkesave të saj, qoftë për zgjedhjen e presidentit apo edhe për bashkëqeverisje me LVV-në. Një numër i konsiderueshëm i deputetëve të LDK-së e kanë konfirmuar se nuk do të jenë ata që do t’i ngrenë kartonët për krijimin e institucioneve dhe për zgjedhjen e presidentit.”, deklaroi Bytyqi.
Ai shtoi se, nëse LDK-ja nuk arrin të jetë e bashkuar sa i përket votave të deputetëve të saj, atëherë një alternativë do të mund të ishte përfshirja e Aleancës për Ardhmërinë e Kosovës (AAK), me ç’rast, sipas tij, do të zgjidhej çështja e zgjedhjes së presidentit.