Vendimi i Bashkimit Evropian për t’i hequr të gjitha masat ndëshkuese ndaj Kosovës deri në fund të muajit të ardhshëm është komentuar nga ish-diplomati Blerim Canaj, i cili ka vlerësuar se heqja e masave nuk duhet të paraqitet si sukses, por si pasojë e përgjegjësive të vonuara shtetërore.
Osmani thotë se BE-ja do t’i heqë të gjitha masat në fund të janarit
Duke komentuar këtë zhvillim në FIVE në TV Dukagjini, Canaj ka thënë se humbja e rreth dy viteve për Kosovën duhet të ketë përgjegjësi politike dhe institucionale.
“Nuk është për tu krenuar heqja e masave. Mendoj që është për tu ndëshkuar forma se si janë futur masat. Dhe mendoj që humbja e 2 vjetëve dikush duhet të përgjigjet. Tash ne e kemi parë që heqja e masave varet nga realizmi apo implementimi i përgjegjësive që i kemi si shtet. Për shkak se keqpërdorimi i këtyre na ka çuar edhe deri të masat. Kjo i bie që nëse ne jemi përgjegjës për veprimet tona, nëse jemi përgjegjës për mekanizmat që e përbën shtetin tonë natyrisht që masat mund të hiqen.
Por nuk e besoj që një qeverie e përgjegjshme çfarëdo qoftë ajo pret që të ndëshkohet me masa, shtetit t’i kushtojë dy vite me radhë. Dhe pastaj ta paraqesë si lavd, që janë hequr masat”, ka thënë Canaj.