Kryeministri i Kosovës, Albin Kurti, të shtunën, përmes një postimi në Twitter, ka shkruar rreth vendimit të ri të Qeverisë për çështjen e targave, duke thënë se me këtë, kanë dëshmuar vendosmëri për zbatimin e vendimeve si dhe për ruajtjen e paqes dhe sigurisë, e që ishte shqetësim i miqve dhe partnerëve ndërkombëtarë.
Kurti, gjithashtu, ka thënë se ky vendim garanton sundimin e ligjit. Sipas tij, partnerët ndërkombëtarë të Kosovës konfirmojnë se është plotësisht në përputhje me marrëveshjen e Brukselit.
“Vendimi i zbatimit garanton sundimin e ligjit nga njëra anë dhe paqen dhe sigurinë nga ana tjetër”, ka shkruar Kurti.
Today our Govt approved gradual implementation of the policy on illegal license plates announced in June, which our int'l partners confirm is fully compliant w/ Brussels agreement. The implementation decision ensures rule of law on the one hand, and peace & security on the other. pic.twitter.com/TXV67JpAVw
— Albin Kurti (@albinkurti) October 29, 2022
Po ashtu, edhe zëvendëskryeministri i Kosovës, Besnik Bislimi, ka thënë se si qeveri kanë treguar vendosmëri për zbatimin e vendimeve si dhe përkushtimin e kontributit në ruajtjen e paqes dhe sigurisë në vend.
Lista Serbe ka reaguar ndaj vendim të Qeverisë së Kosovës për riregjistrimin e targave nga ilegale në ato legale RKS.
Ky vendim përfshin tri masa e qortimit për serbët që nuk konvertojnë targat në RKS, masa e gjobitjes prej 150 eurosh, dhe masa e tretë do të jetë targat provuese. Për këtë ka reaguar Lista Serbe duke paralajmëruar përgjigje dhe rezistencë të ashpër.
Sipas tyre me këtë është duke u rrezikuar liria e lëvizjes dhe është duke u rrezikuar mbijetesa e tyre.
Lista Serbe nëpërmjet këtij reagimi ka shfrytëzuar rastin që të përcjell një mesazh nga presidenti serb, Aleksandër Vuçiq, se qytetarët serbë në Kosovë nuk janë vetëm.
Deputeti i LDK-së, Armend Zemaj, nuk e ka shprehur qëndrimin e qartë në lidhje me shtyrjen apo jo të vendimit për zbatimin e targave.
Zemaj, në një konferencë për media të premten, ka thënë se qëndrimet e LDK-së janë të njohura dhe se qeveria nuk është duke u treguar sa duhet transparente.
Ndërkaq, PDK-ja ka deklaruar se vendimi i Qeverisë në lidhje me targat në veri të vendit, e vërteton përsëri faktin se kryeministri Kurti edhe po tërhiqet nga zbatimi i vendimeve të tij, edhe po e vendos Kosovën në pozicione të kundërta me partnerët ndërkombëtarë.
Sekretari për Marrëdhënie Ndërkombëtare i PDK-së, Bernard Nikaj, ka theksuar se Kurti edhe po tërhiqet nga zbatimi i vendimeve të tij, edhe po vendos Kosovën në pozicione të kundërta me partnerët ndërkombëtarë.