Sot në selinë e Federatës së Futbollit të Kosovës u zhvillua një takim i përbashkët midis MKRS-së dhe përfaqësuesve të klubeve, në prani të ministrit Hajrulla Çeku, zëvendësministres, Daulina Osmani dhe u.d sekretarit të FFK-së, Taulant Hodaj.
Në këtë takim edhe një herë u vu në pah se klubet e futbollit akoma nuk i kanë plotësuar të gjitha dokumentet dhe kriteret për licencim.
Ministria e Sportit fillimisht i kishte vërejtjet e saj tek Federata e Futbollit, të cilës ia ktheu disa herë mbrapsht dokumentacionin, por që shtëpia e futbollit ka bërë përparime rreth licencimit.
Por, asaj i nevojitet licencimi i mbi 50 për qind të klubeve për ta marrë licencën nga MKRS-ja.
Gjatë këtij takimi u vlerësua se procesi i licencimit të FFK-së ka marrë më shumë kohë sesa zakonisht për shkak se FFK është federata më e madhe sportive në vend dhe ka numrin më të madh të anëtarëve dhe sportistëve në krahasim me çdo federatë tjetër. Për momentin, klubet e futbollit ende nuk i plotësojnë kriteret për licencim.