Klubi i futbollit, Chelsea ka njoftuar se trajneri Thomas Tuchel është shkarkuar.
Trajneri gjerman, i cili fitoi Champions League me Blutë në vitin 2021, u shkarkua pas humbjes 1-0 të së martës ndaj Dinamo Zagrebit.
“Klubi i Futbollit Chelsea ka ndarë sot shoqërinë me trajnerin Thomas Tuchel,” ka thënë Chelsea në deklaratën e tyre zyrtare .
Klubi ka shprehur mirënjohje ndaj trajnerit në fjalë dhe stafit të tij. Sipas tyre, Thomas me të drejtë do të ketë një vend në historinë e Chelseat pasi fitoi Ligën e Kampionëve, Superkupën dhe Kupën e Botës.
“Në emër të të gjithëve në Chelsea FC, klubi dëshiron të shprehë mirënjohjen e tij për Thomas dhe stafin e tij për të gjitha përpjekjet e tyre gjatë kohës së tyre me Klubin. Thomas me të drejtë do të ketë një vend në historinë e Chelseat, pasi fitoi Ligën e Kampionëve, Superkupën dhe Kupën e Botës për Klube në kohën e tij këtu”, thuhet tutje në deklaratën e tyre.
Po ashtu, Chelsea ka bërë të ditur se stafi stërvitor do të marrë përgjegjësinë për skuadrën, për stërvitjen dhe përgatitjen e ndeshjeve tona të ardhshme, pasi klubi duhet të lëvizë me shpejtësi për të emëruar një trajner të ri.
Ndërsa, sipas tyre nuk do të ketë komente të mëtejshme derisa të bëhet një emërim i ri i trajnerit.
Tuchel u shkarkua nga Chelsea pas 100 ndeshjesh në krye të skuadrës perëndimore të Londrës.
Chelsea Football Club part company with Thomas Tuchel.
— Chelsea FC (@ChelseaFC) September 7, 2022
Vendimi për shkarkim të trajnerit të Chelseas erdhi një ditë pasi skuadra humbi nga Dinamo Zagreb 1-0, në ndeshjen e parë të grupit në Champions League.
Në gusht, Blutë u mundën 3-0 nga Leeds United, përpara se të pësonin edhe një humbje 2-1 nga Southampton nëntë ditë më vonë.
Chelsea theu rekordin e shpenzimeve të transferimeve në Premier League këtë verë, duke shpenzuar 253.79 milionë funte për lojtarë të rinj, por kjo nuk e ka penguar klubin të shkarkojë trajnerin e tyre të nderuar.
Ndërkaq, Chelsea ka humbur dy nga gjashtë ndeshjet e para në Premier League.
Chelsea ishte skuadra me shpenzimet më të larta në Evropë gjatë afatit kalimtar me një shpenzim prej afro 300 milionë dollarësh.