Këshilltari i lartë i Departamentit amerikan të Shtetit, Derek Chollet, ka thënë se për Shtetet e Bashkuara të Amerikës është me rëndësi që të formohet Asociacioni i Komunave me shumicë serbe.
Dhe kjo sipas Chollet, është në përputhje me Kushtetutën e Kosovës, por ka një dallim të madh në mes të Republikës Srpska.
“…për Shtetet e Bashkuara të Amerikës është me rëndësi që të formohet Asociacioni i komunave me shumicë serbe, mendojmë se kjo është në përputhje me Kushtetutën e Kosovës, por ka një dallim të madh në mes të Republikës Srpska dhe Asociacionit të ardhshëm”, ka thënë Chollet për “N1”.
“Duhet të jem i qartë, nuk është një organ që do t’i ngjante Republikës Srpska”, ka shtuar Chollet.
Ai gjithashtu shtoi e se përpjekjet për tërheqjen e njohjeve të Kosovës në bashkësinë ndërkombëtare janë humbje kohe dhe energjie.
Chollet nuk ka dashur të flasë për specifikat lidhur me juridiksionin e mundshëm të Asociacionit, duke thënë se këto detaje duhet të “lustrohen” përmes dialogut.
I pyetur për spekulimet e mediave rreth të ashtuquajturit propozim franko-gjerman, për të cilin presidenti Aleksandar Vuçiq thotë se përfshin një formë të njohjes së pavarësisë së Kosovës, Chollet shtoi se nuk dëshiron të flasë për specifika.
“SHBA-ja mbështet dialogun e ndërmjetësuar nga BE dhe qëllimi (i saj) është normalizimi në drejtim të njohjes reciproke”, ka thënë Chollet.