Dronët nënujore ukrainase kanë goditur dy cisterna të flotës së ashtuquajtur “hije” të Rusisë në Detin e Zi, ka konfirmuar një zyrtar i shërbimit të sigurisë ukrainase (SBU).
Ukraina mori përgjegjësinë për sulmet, pasi shpërthime goditën anijet të premten dhe të shtunën.
Një burim i sigurisë ukrainase i tha CNN-it se sulmet u kryen me dronët detarë “Sea Baby”, në një operacion të përbashkët mes SBU-së dhe marinës ukrainase. Rusia ende nuk ka komentuar. Sipas burimit, të dy cisternat kanë pësuar “dëmtime kritike” dhe praktikisht janë nxjerrë jashtë funksionit — një goditje e rëndë për transportin e naftës ruse.
Rusia përdor qindra cisterna, shpesh të regjistruara nën flamuj të vendeve të ndryshme për arsye komoditeti ligjor dhe financiar, për të dërguar naftën te klientët duke anashkaluar sanksionet ndërkombëtare.
Njëra prej cisternave të goditura, Virat, që lundron nën flamurin e Gambisë, u sulmua sërish të shtunën pasi ishte dëmtuar fillimisht të premten, sipas Ministrisë së Transportit të Turqisë. Autoritetet turke njoftuan se dëmet ishin të vogla, mbi vijën e ujit, dhe nuk pati zjarr. Anija ndodhej rreth 50 kilometra larg bregut turk dhe, sipas të dhënave të ndjekjes, kishte ngadalësuar dhe ishte drejtuar drejt bregut të premten mbrëma.
“Nuk ka kërkesë nga ekuipazhi për braktisje të anijes,” tha Ministria turke e Transportit, duke shtuar se në vendngjarje është dërguar një rimorkiator kundër zjarrit.